Radio Komunidade Lian Manukoko Ataúro nu'dar medial lokal no nu'dar media dahuluk ne'ebe iha rai Ataúro molok media komunikasaun sira seluk. Media ne'e hetan tulun husi Sekretario Estado Komunikasaun Sosial ne'ebe fasilita husi Centro Radio Comunidade Timor-Leste. Edificio Radio Comunidade Lian Manukoko Ataúro hatur iha posto Administrativo Ataúro, Suco Vila Mau-Meta, Aldeia Eklae. Loron uluk transmisaun iha frekuensia radio ne'e hahu iha data 17 fulan Fevereiru tinan 2016.

Radio ho frekuensia 99.0 Mhz ne'e hamrik ho nia Misaun ida mak atu desenvolve komunidade Ataúro liu husi informasaun ne'ebe nakonu ho lia los, justo, kredibel, transparansia no imparsial. Media komunikasaun ne'e hari'i ho Motto mak "Hafanun Povo, Haklaken Lia Los, Hametin Unidade Pas No Justica". Ho nia Vijaun ida katak liu husi informasaun bele hakbi'it komunidade atu sai sujeitu ba desenvolvimentu iha posto administrativo Ataúro. Objektivo husi Radio Lian Manukoko Ataúro mak atu fahe hanoin, ideas, kritika no sujestaun konstrutivo liu husi programa radio tantu husi Governu, komunidade, sosiedade sivil, igreja. Nune'e bele hari'i komunidade ida ne'ebe iha responsabilidade ba desenvolvimentu lokal.